مشاهدة النسخة كاملة : دراسة جدوى لمشروع مزارع الدواجن لأول مره في المنتديات


ahmed hamdy
06-19-2011, 09:03 PM
بسم الله الرحمن الرحيم


أخواني الاعزاء في ناس كتيير بتسمع أو بتحب تعرف أزاي تعمل وبتكلف كام انهارده أنا هعمل دراسة جدوى بسيطه للمشروع ده


وهنفرض مثلا ان العدد المراد تسمينه 1000 دجاجة


1- هنفترض أنك هتأجر المكان عموما أنت هتعوز تقريبا شهرين والمعتاد أيجار أي مزرعه (عنبر تسمين ) بيكون 100 متر 100 جنيه وممكن تزيد أو تقل على حسب تجهيزات العنبر
طيب هنضع 200 جنيه ايجار في الدوره

2- 100 متر هتعوز تقريبا نصف طن نشاره تمنها لن يتعدى 300 جنيه

3 - هتعوز 1 جركن فنيك + 1 جركن فورمالين + 1 جركن يود أسعارهم كلهم لن تزيد عن 10 جنيه للواحد يعني 30 جنيه

4 - هتعوز تقريبا 5 أنبوبة غاز في الدوره لتدفية 1000 كتكوت يعني هنعوز 50 جنيه أنابيب

5- وكمان تقريبا 20 جنية لمبات فاقده في خلال الدورة

6- وكمان للراجل اللي هيجي يرش المزرعه بالفورمالين والفنيك 25 جنيه

7- تقريبا 150 جنيه أدويه في خلال الدورة وممكن تزيد أو تقل

8- تمن الكتاكيت بيتراوح بين 1.5 لحد 2.5 للكتكوت عموما بيكون 2 في 1000 = 2000 جنيه كتاكيت

9- هتعوز 4 طن علف بيتراوح بين 2500 الى 3200 للطن وغالبا بيكون 2900 في 4 = 11600 جنيه وفي الغالب المزارع كلها بتأكل 3.5 توفيرا للمصاريف يعني 10150جنيه

10- تقريبا 150 جنيه كهرباء ونثريات

الأجمالي : 200 + 300 + 30 + 50 + 20 + 25 + 150 + 2000 + 10150 + 150 = +- / 13075 اجمالي مصاريف

هيطلع عندك متوسط وزن 1.800 في 1000 = 1طن و 800 كيلو +-

متوسط سعر البورصه المصريه للبيع 13 جنيه

هنضرب حنا مش في 13 لأ في 12

يعني 1800 في 12 = 21600 جنيه +-

وكمان هنضيف تمن بيع السبله (النشاره اللي تحت الفرخ ) وتقريبا تمنها هيطلع 400 جنيه

هنضيفهم مع اللي طلع من الفراخ

21600 + 400 = 22000 جنيه تنقص أو تزيد

يبقى نطرح الاجمالي مع بعض

22000- 13075 = 8925 اجمالي الربح وطبعا بيكون في نافق وسرده بس دي بتكون على حسب كل مربي وتقريبا اجمال الربح بيكون 6000 في الدوره من 1000 فرخه وممكن تخسر بس بيكون نتيجة أهمالك


نصيحة مجرب;) ( الموضوع ده مربح بس اذا اتقنت واعتنيت بعملك لأن ممكن ميطلعش معاك وزن وممكن يكون في نسبة نافق عاليه عندك كل اللي أنا قصدي ان لما تيجي تدخل دورة اهتم جدا بيهم أعتبرهم ضيف غالي عليك جدا )
وفي الختام أقول ( اللهم بلغت اللهم فشهد ) والله الموفق



والدراسه دي مهداه لأستاذيmfarghaly]

Mr.jancoo
06-19-2011, 10:04 PM
الله الله الله على الحصريات الجامدة والله الموضوع محترم ومتميز جدا يا غالي ومعلومات قيمة لاي شخص يريد عمل المشروع والخوض في التجربة اسعدني ان اكون اول من يشارك بالمرور على هذا العمل المتميز واتمني واطمع في المزيد والمزيد من الحصريات المتميزة اشكرك اخي الحبيب وتم التقيم للاحقية

ahmed hamdy
06-19-2011, 10:59 PM
أخي وأستاذي العزيز أهلا بحضرتك وشكرا على ذوق حضرتك وكلامك الجميل
ويارب أجعله في ميزان حسناتنا

المنـــار
06-20-2011, 01:28 AM
المحترم لا يعرف الا المحترم اللى زيه

مستر فرغلى مرة واحدة انا قولت برضو انت كينج اسم على مسمى

الصراحة مش عارفة اقول ايه على موضوعك لأن قليل اوى لما تلاقى حد ناوى

يعمل مشروع اى مشروع انه يلاقى يد العون او حتى معلومة صحيحة و عن تجربه

جزاكـ الله كل خير أخى كينج على الموضوع و الملعومات المهمة

جعله الله لك فى ميزان حسناتك

nana
06-20-2011, 01:34 AM
موضوع أكتر من رائع بجد ربنا يبارك فيك

ahmed hamdy
06-20-2011, 02:54 AM
أختى المنار منوره والله العظيم وطبعا أنا عملت الموضوع ده خصيصا علشان خاطر الاستاذ محمد فرغلي ولكي يستفاد الجميع

ahmed hamdy
06-20-2011, 02:57 AM
موضوع أكتر من رائع بجد ربنا يبارك فيك

شكرا جزيلا لك ونورتي الموضوع

mr_madany
06-20-2011, 05:00 PM
اقل ما يقال عن هذا الموضوع انه ممتاز
جزاك الله خيرا اخى كينج
وجعله فى ميزان حسناتك
ولكن عندى استفسار
هل فراخ التسمين تختلف عن فراخ البيض ؟

ahmed hamdy
06-20-2011, 06:03 PM
شكرا لمرور حضرتك mr_mandy
وبخصوص الاختلاف بين دجاج البياض والتسمين
طبعا هناك اختلاف كبير بينهم حيث تختلف التحصينات والادويه والاعلاف يعني في التسمين انت عايز أكبر وزن في أقل وقت فبنستخدم علف عالي في نسبة البروتين عكس البياض لا نريد زادة الوزن وأيضا تضاف الرده على علف البياض عكس التسمين

والتحصينات تختلف عن بعضها لأنك في التسمين مثلا هتبيع الفراخ في مده أقصاها 50 يوم أما البياض فالقطيع بيستمر في المزرعه لمده تتعدى العامان مثلا في تحصينه أسمها الماريك تعطى للبياض عكس التسمين لأن المرض ده بيظهر في الاعمار الكبيرة

وأرجو أني أكون استطعت أن اوصلك المعلومه

وأي أستفسار أنا موجود

المنـــار
06-20-2011, 07:07 PM
معلومات جميلة جدااااااااااا أخى كينج

جزاكـ الله بها كل خير

mfarghaly
06-25-2011, 01:48 AM
الاخ الفاضل والصديق العزيز الاستاذ / احمد حمدى مهما شكرتك على هذا

الموضوع الرائع فلن يوفيك حقك ويكفى ان اقول لك اسال الله العلى القدير

ان يرزقك بكل حرف فى هذا الموضوع بالف حسنه ويضاعفها لك كما يشاء

انه الولى على ذلك والقادر عليه

واعتذر لك عن تاخيرى فى الرد لانشغالى هذه الايام بامور كثير والله المعين

استفدت كثيرا من هذا الموضوع القيم وتشجعت اكثر فى انشاء المزرعه

بقى ان نسال من اين تاتى الكتاكيت الجيده السلاله والمضمونه واى الانواع

افضل من حيث نسبة التحويل ومقاومة الامراض ؟

ومره اخرى اسجل خالص شكرى وامتنانى لشخصك الكريم وجزاك الله كل

الخير فى الدنيا والاخرة

ahmed hamdy
06-25-2011, 05:52 AM
اللهم أمين وجزاك الله كل الخير وأعانك فيما يحبه ويرضاه

بص يا أستاذ محمد نصيحه صغيره جرب الاول الموضوع ده مربح وكل حاجه بس لما بيقسم الوسط بيضيع اللي ورانا واللي قدامنا وعلشان ربنا يعلم أنا بعز حضرتك أد ايه مكنتش هقول كده يعني ممكن حضرتك تجهز أي مكان وحاول متزودش عن 1000 كتكوت
وتجرب فيهم يعني لو كنت هتعمل الارض اللي كنت حضرتك قولتلي عليها فعلى الاقل جرب دورتين في حاجات بسيطه زي 1000 أو 500 تكون تكالبفهم بسيطه وكمان تاخد خبره فيهم وده طبعا مش تعقيد مني في الموضوع المشروع ده مربح جدا جدا أنا بس بأنصح حضرتك

وبالنسبه لمكان شراء الكتاكيت فيوجد كتير جدا عندهم وفي تقريبا شركه عند حضرتك اسمها الاسكندريه للدواجن ممكن حضرتك تجيب نمرتهم من الدليل أو أي شركه أو مكتب بس المهم تسأل الاول عن سمعة كتاكيت الشركه دي ولو حضرتك هتدخل كميه قليله يعني 1000 مثلا وكان المكان بتاعك فالافضل تدخل ساسو وفي نوع جديد أنا لسا هاستلمو انهارده بلدي وبياخد 40 يوم نوع فرنسي لسا أول مره هجربه هشوفو ولو لاقيته جيد هقول لحضرتك على اسمه وكمان البلدي الساسو أفضل من ناحية مقاومة الامراض أما الابيض فأفضل من البلدي في التحويل واذا كنت هتجيب أبيض جيب (ايفن 48 ) نوع ايطالي وكويس جدا التجار عندي بيتعاركو عليه

وفي الاخر لو حضرتك هتدخل فيستحسن في خلال ال 20 يوم دول علشان تطلع على رمضان ان شاء الله الطلب بيكون كبير جدا والاسعار بترفع في السما ولو في أي سؤال مهما كان أنا موجود ولو عايزني أجي لحضرتك اسكندريه انا على اتم الاستعداد

mfarghaly
06-26-2011, 01:57 AM
جزاك الله خيرا اخى الفاضل على نصائحك الغاليه ونسال الله العلى القدير ان

يجعله فى ميزان حسناتك ان شاء الله

بالطبع ان عارف ان نسبة المخاطره موجوده ونحن فى مزارع الاسماك نعرف

جيدا هذه المخاطره ولكن احنا بنعمل اللى علينا ثم نتوكل على الله لان

حضرتك عارف نحن نتعامل مع ارواح واذا كنا لانملك ارواحنا فكيف نملك ارواح من نربى

وللعلم المكان مازال ارض فضاء وليس عليه مبانى وان شاء الله سابدا فى

البناء قريبا وبالطبع انت مدعوا للاشراف عليه من البدايه للاستفاده من خبرة

حضرتك فى بناء مبنى نموذجى خالى من العيوب الفنيه

عموما اشكرك مره اخرى على النصيحه وجزاك الله كل خير

ahmed hamdy
06-26-2011, 03:30 AM
طبعا انا عارف ان حضرتك من اعلم الناس في مخاطر التعامل مع الارواح
وانا مستعد وتحت أمر حضرتك في اي حاجه

ahmed hamdy
07-11-2011, 09:16 AM
للإطلاع على أسعار اليوم من علف وبيع فراخ على الرابط التالي
http://www.fish4arab.com/showthread.php?t=3894

updatoo
09-09-2011, 02:06 AM
شكرا على دراسة الجدوى ياغالى مجهود رائع

ahmed hamdy
09-09-2011, 06:06 PM
لا شكر على واجب يا غالي